Күптән түгел генә мин тележурналистларның һәм сәясәтчеләрнең коронавирус грипптан да яманрак булмаячак дип ышаныч белән сөйләгән видеосын күрдем. Мине аларның ни дәрәҗәдә ялгышулары гына түгел, ә нинди батырлык белән сөйләүләре дә гаҗәпләндерде. Алар мондый сүзләрне ничек курыкмыйча әйтә алдылар икән?
Җавапны аңладым: алар тотылырбыз дип уйламаганнар. Алар ялган фаразларында ниндидер куркыныч булуын күз алдына да китермәгән. Бу кешеләр гел ялган фаразлар ясый һәм җәзасыз кала, чөнки алар фаразлаган нәрсәләрнең нәтиҗәләре я кычкырып-бәхәсләшеп котылырлык дәрәҗәдә аңлаешсыз була, яки алар әйткән сүзләрне бик азлар гына хәтерләрлек бик ерак киләчәктә килеп чыга.
Эпидемия исә бөтенләй башка нәрсә. Ул сезнең фаразларыгызның ялган булуын тиз һәм һичшиксез фаш итә.
Ләкин эпидемияләр шулкадәр сирәк була ки, бу кешеләр мондый хәлнең мөмкин булуын да аңламаган. Киресенчә, алар гадәти алымнарын куллануны дәвам иткәннәр — эпидемия ачыклаганча, ул алым аларның үзләре аңламаган нәрсәләр турында ышаныч белән сөйләүдән гыйбарәт.
Шулай итеп, мондый вакыйга кешеләрнең кем икәнен белү өчен кабатланмас көчле ысул булып тора. Уоррен Баффетт әйткәнчә, «Су чигенгәч кенә кемнең шәрә йөзгәне ачыклана». Ә су әлегә кадәр беркайчан да булмаганча нык чигенде.
Нәтиҗәләрне күргәч, күргәннәребезне истә тотыйк, чөнки бу — безнең кулда булырга мөмкин иң төгәл ышанычлылык сынавы. Һәрхәлдә, шулай дип өметләнәм.